Straum og høgspent

Rundt høgspentlinjer og transformatorar oppstår det elektriske og magnetiske felt, som samla blir kalla elektromagnetiske felt, EMF. Det helsemessige fokuset har vore knytt til magnetfeltet.

Grenseverdien for magnetfelt frå straumnettet i Noreg er 200 mikrotesla (µT) for befolkninga. Grenseverdien gjeld for kortvarig opphald som leik, passering og andre tidsavgrensa aktivitetar rundt høgspentanlegg. Vi blir normalt ikkje eksponert for så høge verdiar.

Verdiane rett under dei kraftigaste høgspentlinjene vi har i Noreg, kan kome opp i 15–20 µT.

Den som planlegg oppføring av bustad, skule eller barnehage i nærleiken av høgspentanlegg, må greie ut om magnetfeltnivåa kan bli høgare enn 0,4 μT i snitt over året. Dette gjeld også for dei som ynskjer å oppføre eller oppgradere høgspentanlegg nær same type bygg. Utgreiing skal gjerast der barn får langvarig opphald nær høgspentanlegg.