Ei radonmåling skal gjennomførast i minst to månadar mellom midten av oktober og midten av april. Dersom du ikkje allereie er godt i gang med å måle, rår vi deg difor til å vente til neste målesesong. Ny målesesong startar igjen i midten av oktober.
Radon er ein radioaktiv gass, og radon i bustaden aukar risikoen for lungekreft. Noreg er eit av dei landa i verda som har dei høgaste konsentrasjonane av radon i bustader. Årsaka er både dei geologiske forholda i landet vårt, klimaet og måten vi byggjer bustadene våre på.
Det er ikkje mogleg på førehand å seie om akkurat din bustad har eit radonproblem. Den einaste måten å finne det ut på er å måle. Å måle radon er både enkelt og rimeleg, og DSA tilrår alle å gjere det.